أبن ليل بقلم اميره أسامه

انك مش هتتخلي عنهم اختارتك انت
قولتله انت ليه بتتكلم علي انك هتعمل العمليه ومش هترجع انت هتبقي كويس
قالي لو رجعت من العمليه سليم قراري مش هيتغير لاني مش هقدر اكمل ووقتها واثق بردوا انكم هتهتم بيا بس لو مرجعتش وانت موافقتش الوقت كل اللي بملكه هيروح تعبي وشقايا ومجهودي هيضيعوا علي الفاضي اسمي واسم ابويا هيروحوا مني لو صحيح بتعزني وافق يا كرم حافظ علي اسمي واسم ابويا حافظ علي مجهودي اللي تعبت فيه وكمله بطريقتك.
بصتله وانا مس عارف اقوله ايه مكنتش قادر امنع دموعي ولا هو كمان وبعد محاولات منه في اقناعي وافقت خدني وطلعنا للمحامي ومضيت وكل حاجه الراجل ده كان بيملكها بقت بتاعتي يوم العمليه كنت معاه من قبلها بيوم وانا اللي مضيت علي إقرار العمليه
ودخل العمليه غاب كذا ساعه وانا بره قاعد علي اعصابي حاسس ان اي خبر وحش ممكن اسمعه هيموتني الراجل ده فعلا كان غالي عندي اوي
خرج من العمليات بعد سبع ساعات الدكتور قال ان حالته مستقره لكن هيفضل في الرعايه علي الاقل اسبوع
فضلت اربع ايام معاه مش بسيبه لحظه وهو من وقت العمليه وهو في غيبوبه يادوب يصحي كام دقيقه مبيتكلمش خالص يبصلي من الازاز ويرجع يغيب تاني و علي بليل الوقت اللي قررت اسيبه فيه شويه واروح اصلي العشاء رجعت لاقيت دكاتره بتجري وممرضين مشهد زي اللي بنشوفه في الافلام وانا واقف زي العيل الصغير لا فاهم في ايه ولا عارف المفروض اعمل ايه
جريت وراهم وبصيت عليه من بره كانوا بيحاولوا يسعفوا بكل الطرق لكن للاسف مكانش بيستجيب وفجأه الشريط انتظم و شوفت ملامح الدكاتره عليها أسف وبيهزوا راسهم بمعني مفيش فايده يومها حسيت ان قلبي بيتداس عليه تاني بعد ما رجع فاق من وجعه علي ايد الراجل ده . وجعني بجد وعمري ما تخيلت ان اتوجع بالشكل ده علي حد مش مني
عملتلوا عزاء يتحاكي بيه في اسكندريه كلها من بحري لجليم جنازته والعزاء بتاعه مكانش فيهم نفس من ابسط عامل لأعلي مستوي لرتب من السچن الكل حزن عليه بجد كنت عارف انه محبوب بس محستش بده غير لما شوفت بعيني الناس وهي بتتسابق علي شيل النعش وتقديم العزاء لحد اخر وقت الناس كانت موجوده العزاء خلص ونفس العدد مقلش لحظه .
كان ديما قولي كلمه بترن في ودني علي طول كان بيقولي سيرة البني ادم بتعيش اطول من عمره سواء كانت حلوه او وحشه وادام هنروح ومش هناخد معانا اي حاجه يبقي نحاول علي قد ما نقدر نمشي واحنا سايبين. ورانا سيره حلوه وناس تفتكرنا وتبتسم وتدعيلنا من قلبها اول ما اسمنا يتذكر
وحقيقي الراجل ده ساب سيره حلوه
بعد ما اټوفي بأسبوع او عشر ايام لاقيت المحامي بيكلمني عشان نبدأ في تخليص الورق واستلم كل حاجه انا وقت ما مضيت يا دره معرفتش انا مضيت علي ايه غير بس انه بيتنازلي عن شركته مكانش في بالي مش عشان انا مش محتاج وعندي كتير وابويا عنده اكتر بس عشان انا حقيقي كنت حابب اريحه مش اكتر كان عندي امل انه يخف ويرجع و ارجعله كل اللي كتبه
بس اتفاجئت لما عرفت الراجل ده سايبلي ايه بصلها بحزن وهو عينه بتلمع بالدموع
انا فجأه لاقيت نفسي بقيت مليونير من مفيش اراضي وبيوت وڤيلا وشركه وعربيتين و اهم حاجه في ده كله
ابن ليل
ابتسمت دره من بين دموعها.
دره....ابن ليل طلع اللانش بتاعه
كرم....ايوه وده الحاجه الوحيده اللي كان يملكها بعد ما خرج من السچن في يوم قالي انا نفسي يا كرم اشتري لانش زي اللي هناك ده وشاورلي علي لانش جميل قولتله لو معاك وحابب يلا بينا وانا هخلصلك فيه انا عارف ناس تجيبهواك بسعر كويس ضحك وضړبني علي كتفي قاللي انت يا ابن امبارح هتتوسطلي
ضحكت وقولتله عايز اعمل معاك اي جميل
قالي وانا مس هكسفك غبت عنه كام يوم وبعدين اتصلت بيه وقولتله عايز اشوفك ضروري جالي ولاقاني واقف مع واحد وقدامنا اللانش اللي شاور عليه
اټصدم وقالي ده نفس اللانش ضحكت بتحدي وقولتله شوفت بقي ان ابن امبارح قادر يجبلك