أبن ليل بقلم اميره أسامه

بالله وعارف ده كويس
عمرو.....عارف يا دكتور كرم واللي فيه الخير يقدمه ربنا الحياه اكيد هتمشي بس محتاج وقت
كرم....خد وقتك كله بس اوعي تسيب الحزن يجي عليك او علي ولادك ولازم تتأكد ان والدتك لو كانت عايشه كانت هتقولك كده بنفسها.
عمرو....ربنا يرحمها يارب
كرم....اللهم امين اطمنت علي ياسين خرج من الرعايه
عمرو....اه الحمد لله شوفته وقلبي ارتاح شويه.
كرم....إن شاء الله كلها كام يوم ويخرج معاك ويرجع يطنطط ويملي عليك الدنيا سعاده
عمرو....يارب هي مريم فوق صح
كرم.....لا هما مش هنا كلهم مشيوا الصبح راحوا يرتاحوا شويه انت عارف قعدتهم هنا مفيش منها فايده وست سونه خدت معاها مريم والوقت يرجعوا
عمرو.....دي اكيد جننتها والله مش عارف اقولها ايه
كرم...لا جننتها ولا حاجه مريم ماسكه فيها وخدت عليها وبعدين متقلقش علي سونه هي هتعرف تتعامل معاها اطمن.
عمرو....ربنا يجازيها كل خير هروح اغير وارجع علي طول
كرم....تمام يكونوا رجعوا وتطمن علي مريم
عمرو.....تمام بعد اذنك
كرم....اتفضل.
.............
بعد شويه وصلوا كلهم وطلعوا علي فوق اطمنوا علي الشباب ودخل زكريا ونبيله يطمنوا علي البنات.
زكريا....عاملين ايه الوقت يا بنات
البنات....بخير يا جدو الحمد لله
قرب زكريا من دارين باسها من راسها وسمعها وهي بتهمس.
دارين....بابي بابي انت فين ليه كده يا بابي.
زكريا....لا حول ولا قوة إلا بالله وبعدين يا ناس البت دي هتفضل كده.
عبدالله.....متقلقش عليها يابا هتبقي كويسه.
زكريا....لله الامر من قبل ومن بعد
عبدالله....روح يلا علي هناك عشان الاكل ميبردش وانتوا يا بنات هسيبلكم الاكل هنا دره وسونه هياكلوا معاكم
نبيله ....وانا كمان هنفضل معاهم
عبدالله....طيب اهي ستكم كمان هتاكل هنا يلا بينا يا ابا.
زكريا....يلا يا ابني كلم دره وكرم يجوا بقي قبل ما الفراخ تجلد.
عبدالله.....بكر قال هيكلمهم.
راحوا علي هناك و خدت دعاء منه الاكل وهي و مها طلعوا وجهزوا مع بعض.
رفاعي....البنات عاملين ايه يا زكريا
زكريا.....بخير بس دارين زي ما هي البت من وقت ما طلعت من العمليات وهي بتخترف طول الوقت بأسم أبوها مش عارف نعملوا ايه.
رفاعي.....وانت في ايدك ايه بس يا زكريا وبعدين البت معذوره كان زمانه معاهم الوقت.
زكريا.....انا بنفكر نقول لدره تهدي الدنيا علي الاقل الوقت عشان بنتها وتخلي ابوها حتي يكلمها في التليفون بيتهيألي لو سمعت صوته هتتحسن هي كانت بتقول ان البنات مرتبطين بيه.
نجوي....ما بلاش يا معلم انت عارف ان دره من اخر مره وهي علي اخرها ده يوم ما عرفت ان بنتها ردت عليه انت عارف حصل ايه
مها.....امي معاها حق يابا دره الفتره دي شالت فوق طاقتها بيتهيألي في الظروف اللي فيها دي لو بس سمعت سيرته ھتتجن
زكريا....بس الوقت الوضع مختلف يا جماعه بنتها محتاجه ابوها ومهما كان الاب قاسې ولاده بردوا بيحنوا ليه واكبر دليل ان البت وهي مش في وعيها بتنادي عليه وده اصدق وقت تخرج فيه اللي في قلبها انا صحيح معاشرهم يادوب داخلين علي ثلاث شهور بس قدرت نعرف ان دارين من النوع الكتوم مبتعرفش تقول علي اللي جواها وبحس انها بتضغط علي روحها عشان خاطر امها
دعاء.....ايوه يابا بس تفتكر يعني ان مكالمته ليها هتخليها تقوم تتنطط ده مش بعيد البت تتعب اكتر
زكريا....لا مش هتتعب يا دعاء واه يمكن لما تسمع صوته حالتها تتحسن شويه
بكر.....بص يابا انت طبعا تعرف دره اكتر مننا واكيد عندك علم برد فعلها شوف الصالح فين واعمله وعايز تفاتحها فاتحها بس علي الاقل سيبها تاكل الاول وبعدين قولها انت عارف انها لا بتاكل وبتشرب عدل
مها....صح لو قولتلها حاجه الوقت لا هتاكل ولا هتحط حاجه في بوقها والبت وشها اصفر
زكريا.....لا مش هقولها غير لما تاكل وعلي الله بس هي تفهمني وتسمع مني و متنشفش راسها
رفاعي.....اكيد مش هتنشف راسها ادام ده في مصلحه لبتها واللي عايزه ربنا يكون
زكريا....يارب.
عبدالله....پغضب علي الله بس لو هي وافقت هو يطلع راجل ويرد عليها والله العيال دي خساره فيه
زكريا.....بنقولك ايه مش وقت عصبيتك دي احنا لسه مش عارفين نقنعوا اختك ازاي
بكر.....عبدالله هدي دنيتك شويه مش وقتك كل اللي يهمنا الوقت هي دارين واختك مش ناقصه
عبدالله....مش هننطق خلاص بس يكون في علمكم اي رد فعل دره هتعمله هيكون حقها والواطي ده ميستاهلش ولو هتسمعوا رأيي اللي باع مش هو اللي هيرجع ويداوي اللي يقدر يبيع ضناه